«Тошшаҳартрансхизмат»нинг хабар беришича, шу йилнинг 8−10 ноябр кунлари Тошкент шаҳрида Иқтисодий ҳамкорлик ташкилотининг 16-саммити ўтказилиши ҳамда пойтахтнинг айрим кўча йўл тармоқларида автомобиллар ҳаракати чекланиши туфайли шаҳардаги автобус йўналишларининг фаолиятига бир қанча ўзгартиришлар киритилади.

Унга кўра, Ислом Каримов кўчасининг Фурқат кўчасидан Олмазор кўчасигача бўлган қисми автомобиллар ҳаракати учун тўлиқ ёпилиши сабабли, ушбу манзил орқали ҳаракатланувчи:

• 51-сонли йўналиш ҳаракати И.Каримов кўчасидан Афросиёб, Бешёғоч, Фурқат кўчалари орқали вақтинчалик ўзгартирилади;
• 141-сонли йўналиш ҳаракати Қоратош кўчасидан Фурқат, А.Навоий, Олмазор кўчалари орқали вақтинчалик ўзгартирилади;
• 196-сонли йўналиш ҳаракати Афросиёб кўчасидан Бешёғоч, Фурқат, А.Навоий кўчалари орқали, кейинги ҳаракати ўз йўналиши бўйича  ташкил этилади.

Шунингдек, тадбир иштирокчиларининг белгиланган манзилларгача ҳаракатланиши жараёнида бир нечта йўналишларда оралиқ интервал вақтлари ва қатнов вақтларининг ортиб кетиш ҳолатлари юзага келиши мумкин. Жумладан:

• Бобур кўчаси орқали ҳаракатланувчи 11, 40, 45, 47, 67, 76, 77, 94-сонли автобус йўналишларида;
• Нукус кўчаси орқали ҳаракатланувчи 2, 12, 80, 81, 97, 127, 196-сонли автобус йўналишларда;
• Ойбек кўчаси орқали ҳаракатланувчи 57, 67-сонли йўналишларда;
• Афросиёб кўчаси орқали ҳаракатланувчи 13, 196-сонли йўналишларда;
• Ш.Рашидов кўчаси орқали ҳаракатланувчи 30, 37, 57, 85, 97, 140-сонли йўналишларда;
• И.Каримов кўчаси орқали ҳаракатланувчи 1, 19, 21, 51, 60, 67, 85-сонли йўналишларда;
• А.Навоий кўчаси орқали ҳаракатланувчи 28, 30, 37, 44, 46, 57, 68, 78, 89, 91, 97, 115, 140-сонли йўналишларда.

Бундан ташқари, Транспорт вазирлиги заруриятдан келиб чиққан ҳолда йўловчиларни ташиш узлуксизлигини таъминлаш мақсадида йўналишлар ҳаракатига қўшимча ўзгартиришлар киритилиши мумкинлигини айтган.

«Ўзбекистон ҳаво йўллари» эса йўловчилардан кўчалар ҳамда Тошкент халқаро аэропортига олиб борувчи айланма йўллар кўрсатилган харита билан танишиб чиқишни сўраган.

Эслатиб ўтамиз, аввалроқ Ўзбекистонда Иқтисодий ҳамкорлик ташкилотининг навбатдаги саммити бўлиб ўтиши ва унда саккизта давлат ҳамда ҳукумат раҳбарларининг иштирок этиши айтилганди.