Ижтимоий тақмоқларда Тошкент вилояти ССБ бошлиғи Улуғбек Абдуғаниев тиббиёт ходимларини ҳашарга жалб қилиш орқали мажбжрий меҳнатга йўл қўяётгани ҳақида хабарлар тарқалганди. Бу хабарларга Тошкент вилояти ҳокимлиги расмий муносабат билдирди.

Хабарда бошқарма бошлиғи бу ўринда тизим ишчи-ходимларини ўзлари меҳнат қилаётган муассаса ободончилиги йўлида ҳашарга чиқишни айтган.

Улуғбек Абдуғаниевнинг сўзларига кўра, бу мажбурий меҳнат эмас. Ходимлаар ички жамоавий ишларда қатнашиши ҳақидаги меъёр жамоа шартномасида кўрсатилган.

Тошкент вилояти ҳокимлиги маълумот беришича, 2023 йил 18 октябр куни Тошкент вилояти маҳалла фаоллари, нуронийлар, хотин-қизлар ва ёшлар вакилларининг вилоят аҳлига мурожаати эълон қилинган. (Мурожаат матни «Тошкент ҳақиқати» газетасида чоп этилган)

Тошкент вилояти ҳокими Зойир Мирзаев шу асосда вилоятда умумхалқ ҳашари ўтказиш тўғрисида қарор қабул қилган ва аҳолига видеомурожаат йўллаган.

Зойир Мирзаев умумхалқ ҳашарига оид мурожаатида тураржой мавзелари ва маҳаллаларда иқлим шароитига мос кўчатлар экиш, аҳоли турар жойлари, хиёбонлар, зиёратгоҳлар, қабристонлар ва болалар майдончаларини ободонлаштиришда фаол қатнашиши лозимлигини таъкидлаган.

Булардан келиб чиқиб, Тошкент вилояти Соғлиқни сақлаш бошқармаси бошлиғи Улуғбек Абдуғаниев ўзбекона қадриятлар ва табиатга эътибор нуқтаи назаридан ходимларни ҳашарга фаол қатнашишга чақирган.

Ҳокимлик мазкур вазиятни мажбурий меҳнат деб талқин қилиш ўринсиз деб ҳисоблаган.