ЎзА берган хабарга кўра, Тошкент вилоятида қалбаки пулларни муомалага киритмоқчи бўлган шахс ушланган. Давлат хавфсизлик хизмати Тошкент вилояти бўйича бошқармаси ходимлари томонидан вилоят божхона ва ички ишлар бошқармаси билан ҳамкорликда Бекобод тумани ҳудудида тезкор тадбир амалга оширилиши натижасида фуқарода 250 миллион сўмдан ортиқ қийматдаги сохта суммалар мавжудлиги аниқланган.

Келтирилишича, у Сирдарё вилоятининг Ховос туманида яшовчи А.Р. бўлиб, ноқонуний тарзда қўлбола усулда тайёрланган 250 миллион 800 минг сўм миқдоридаги 100 минг сўмлик қалбаки купюраларни 100 миллион сўмга сотмоқчи бўлган вақтида қўлга олинган.

Эслатиб ўтамиз, аввалроқ Бухорода қарийб 353 миллион сўмлик ноқонуний товарлар айланмасига чек қўйилганди.