Тошкент вилояти Тошкент туманида сув бўйига қурилиш чиқиндиларини тўкиб кетган фуқаронинг юк машинаси мусодара қилинди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар берди.

Қайд этилишича, туманнинг «Қорасарой» маҳалласидан оқиб ўтувчи сув бўйига қурилиш чиқиндилари тўкиб кетилган. Мазкур ҳолат эса ҳудуддаги хонадонлардан бирига ўрнатган кузатув камерасига тушиб қолган.

Тезкор экологик суриштирув ишлари натижасида чиқиндиларни шу маҳалланинг Истиқлол кўчасида яшовчи фуқаро А.Т. ўзининг «Зил» юк машинаси ёрдамида ташлагани аниқланган.

Таъкидланишича, А.Т. аввал ҳам шундай ҳуқуқбузарлик содир этган ва 2023 йилнинг 7 сентябрь куни Маъмурий жавобгарлик тўғрисидаги кодекснинг 91-1- моддаси (Белгиланмаган жойларга қаттиқ маиший чиқиндиларни ва қурилиш чиқиндиларини ташлаш, шунингдек суюқ маиший чиқиндиларни тўкиш) 3-қисми билан далолотнома тузилиб, базавий ҳисоблаш миқдорининг беш баробарида – 1 миллион 650 минг сўм жарима қўлланилган. Орадан 8 кун ўтиб эса фуқаро томонидан такрорий ҳуқуқбузарлик содир этилган.

Маълумот учун, Маъмурий жавобгарлик тўғрисидаги кодекснинг юқоридаги моддасига кўра, ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, ҳуқуқбузарлик қуроли мусодара қилиниши
белгилаб қўйилган.

Шунга асосан, айни дамда А.Т. нинг транспорт воситаси вақтинча сақлаш учун жарима майдончасига қўйилиб, мусодара қилиниши юзасидан ҳужжатлар тўпланган ва судга даъво аризаси киритилаётгани маълум қилинган.