Тошкент вилоятида уч туп чинорни кесганларга нисбатан жиноят иши қўзғатилди
Дарахтларни кесиш орқали табиатга 148,7 млн сўмлик зарар етказилган.
Тошкент вилояти Юқори Чирчиқ туманида уч туп чинор дарахтини кесган шахсларга нисбатан жиноят иши қўзғатилди. Бу ҳақда вилоят Экология бошқармаси матбуот хизмати хабар берди.
Қайд этилишича, туманнинг «Файзобод» МФЙ ҳудудида уч туп чинор дарахти кесилгани аниқланган. Вазирлар Маҳкамасининг 2022 йил 22 августдаги «Давлат ўрмон фондига кирмайдиган дарахтлар ва буталарни экиш, парвариш қилиш ва улардан фойдаланиш тартибини янада такомиллаштириш тўғрисида»ги қарорига асосан, ушбу ҳолатда табиатга етказилган зарар миқдори 148 миллион 793 минг 500 сўмни ташкил этгани аниқланган.
Ҳолат юзасидан вилоят прокуратураси томонидан жиноят иши қўзғатилиб, ҳозирда тергов ҳаракатлари олиб борилаётгани маълум қилинган.
Эслатиб ўтамиз, аввалроқ Андижонда уч туп чинорни кесганлар икки йилга озодликдан чекланган эди.
