Ижтимоий тармоқларда Тошкентдаги мактабда ўқувчилар қартабозлик қилгани ҳақида хабарлар тарқалди. ММТБ ҳолатга изоҳ берди.

Маълум қилинишича, видеолавҳада акс этган воқеа бундан икки йил аввал, яъни 2022/2023-ўқув йилининг тахминан октябрь–ноябрь ойларида Мирзо Улуғбек туманидаги 187-мактабда кузатилган. Ўқувчилар устозига билдирмасдан қартабозлик қилишган, бу ҳолатни ўқитувчи кўрмаган.

Бу воқеа ўша пайтнинг ўзида мактаб маъмурияти, ички ишлар ходимлари, психолог, ўқувчилар ва уларнинг ота-оналари иштирокида муҳокама қилиниб, профилактик тушунтириш ишлари олиб борилган. Ўз навбатида, ўқувчиларнинг ота-оналаридан Маъмурий жавобгарлик тўғрисидаги кодекснинг 47-моддасига асосан жарималар ундирилган. Ҳолатни тасвирга олган ўқувчилар ўқув йили охирида бошқа мактабга ўтган.

«Афсуски, эски видео тасвирнинг қарийб икки йилдан сўнг, яна ижтимоий тармоқ саҳифаларида қайта чоп этилганлиги ташвишланарлидир», — дейилади хабарда.

Аввалроқ Тошкентда тарих дарси вақтида қарта ўйнаган мактаб ўқувчиларининг ота-оналари ва синф раҳбари жазоланганди.

«Сўнгги пайтларда таълим муассасаларида ‘Давомат’, ‘Тиғ’ каби тадбирларнинг мунтазам ўтказилиши айрим ота-оналарга ёқмаётганлигини яширмаймиз.

Шундай экан, Сизлардан илтимос, фарзандингизнинг фақат мактабга бориши эмас, балки унинг папкасида нималар борлиги, кўча-кўйда кимлар билан ўртоқлиги, дарсларни қандай ўзлаштираётганлиги билан ҳам қизиқсангиз айни муддао бўлур эди», — деган эди ММТБ.