Тошкент шаҳар Ички ишлар бош бошқармаси ҳузуридаги Тергов бошқармаси фоизга қарз бериб, қарздорларнинг мулкини тортиб олган эркакни ушлади. Бу ҳақда бошқарма ахборот хизмати хабар берди.

Аниқланишича, 31 ёшли А.Т. фуқароларга фоиз эвазига пул бериб, қарз олган шахснинг номида бўлган турар-жой ва транспорт воситаларини гаров эвазига ўзининг номига расмийлаштириб олган. Фуқаролар белгиланган муддатда қарз ва фоизларини бермаган тақдирда уй-жойдан оиласи билан чиқариб юбориш ва транспорт воситасини тортиб олиш билан шуғулланиб келган.

Қайд этилишича, гаровга қўйилган мулк миқдори фоиз эвазига берилган пул маблағидан 3-4 баробар кўп бўлган. Тергов бошқармаси томонидан Жиноят кодексининг 165-моддаси (“Товламачилик”), 168-моддаси (“Фирибгарлик”) билан тергов қилинаётган жиноят иши доирасида гумонланиб ушланган. Унга нисбатан қамоққа олиш тарзидаги эҳтиёт чораси қўлланган.

Аввалроқ Тошкентда Paynet шохобчасида картасига пул тушириб қочиб кетган эркак ушланганди. Унга нисбатан талончилик моддаси билан жиноий иш қўзғатилган.