Тошкентда 131-сонли йўналишда ҳаракатланувчи автобуснинг «гармошка» қисмига шикаст етди. Бу ҳақда «Тошшаҳартрансхизмат» АЖ Ахборот хизмати хабар берди.

Маълум бўлишича, воқеа жорий йилнинг 11-сентабр куни, соат 21:35 ларда Янгиҳаёт тумани, Сергели 1-мавзеси, Изумруд ресторани қаршисида содир бўлган.

Аниқланишича, «12-Автобус» саройи филиали тасарруфидаги King Long русумли, давлат рақами 01|805 LKA бўлган ва ҳайдовчи А.А томонидан  ҳаракатланаётган автобус йўлнинг қатнов қисмида жойлашган қудуқнинг атрофи чўкиши оқибатида шикастланган.

«Қудуқ атрофида чуқурлик ҳосил бўлган ва автобуснинг ўрта ғилдираклари қудуққа тушиб кетган. Натижада эса маҳкамланган қудуқ қопқоғи автобуснинг уланган таг ва ўрта қисми(гармошка)га шикаст етказган», — дейилади хабарда.

Ҳодиса натижасида автобусдаги йўловчиларга зарар етмаган. Ҳозирда ушбу йўл-транспорт ҳодисаси Тошкент шаҳар ИИББ ЙҲХБ томонидан расмийлаштирилган.

Эслатиб ўтамиз, аввал Тошкентда йўловчи автобуси ёниб кетган эди.