Bugun.uz’нинг ИИВдаги манбаларига кўра, «Замонавий аёллар» клуби томонидан ўтказилган Atlas Party миллий либослар тарғибот тадбирида иштирок этган аёлларни обрўсизлантириб, хақоратлагани акс этган видеодаги эркакка нисбатан 15 сутка қамоқ жазоси тайинланган.

23 апрель куни фуқаро М.Д. Шайхонтоҳур тумани ИИО ФМБга таклиф этилганда, у ўзининг шахсий диний қарашларидан келиб чиққан ҳолда атлас тарғиботини олиб борган аёлларга нисбатан хақоратли сўзлар ишлатганлиги тан олган.

Ушбу ҳуқуқбузарлик ҳолати Шайхонтоҳур туман суди томонидан кўриб чиқилиб, М.Д.га нисбатан Маъмурий жавобгарлик тўғрисидаги кодекснинг 183-моддаси (майда безорилик) асосида 15 сутка муддатга маъмурий қамоқ жазоси тайинланган.

Аввалроқ, мазкур ҳолат юзасидан Atlas Party тадбирининг бир қатор иштирокчилари ҳамда Оила ва хотин-қизлар қўмитаси ички ишлар идораларига мурожаат қилиб, эркакка нисбатан қонуний чора кўриш учун ариза бергани ҳақида хабар берилганди.