Тошкентда автомашиналарни 3 ой муддат ичида автосалондан етказиб беришни айтиб, фуқаролардан 6,1 млрд сўмни алдаб олган шахслар қамалди. Бу ҳақда ЎзА маълум қилди.

Қайд этилишича, олдиндан жиноий тил бириктирган 3 нафар шахс томонидан пойтахтнинг Алишер Навоий кўчасида «Мy Cars» номи билан автосалон очилган.

Ушбу жиноий шериклар 2022 йил 16 январдан 2023 йилнинг 2 августига қадар бўлган вақт оралиғида машиналарни 3 ой муддат ичида автосалондан чиқариб, етказиб беришни айтиб, жами 74 нафар фуқаронинг 40 млн сўмдан, 200 млн сўмгача бўлган жуда кўп миқдордаги, жами — 6 млрд 155 млн сўмлик пул маблағларини фирибгарлик йўли билан қўлга киритишган.

Харидорларни қабул қилишда эса улар гўёки GM Uzbekistan билан шартнома тузганликларини айтиб алдашган. 

Жиноят ишлари бўйича Шайхонтоҳур туман суди ЖКнинг 168-моддасининг (фирибгарлик) тегишли бандлари билан айбланувчиларга 8-9 йилгача озодликдан маҳрум этиш жазосини тайинлади.