Бугун, 4 ноябр куни ижтимоий тармоқларда Тошкент шаҳри Сергели туманидаги аэропорт ҳудудида авиаспоттинг (ҳаво кемаларининг ҳаракатини кузатиш ва тасвирга олиш) билан шуғулланаётган бир нечта бола ҳуқуқ-тартибот идоралари ходимлари томонидан ушлаб кетилгани ҳақида хабарлар тарқалди.

Uzbekistan Airports матбуот хизмати ҳолат юзасидан муносабат билдириб, маълум қилишича, мазкур воқеа туманннинг «Қумариқ» маҳалласида содир бўлган.

Олти нафар бола ҳаво бандаргоҳи чегарасини бузмаган ҳолда, аэропорт панжараси ортидан туриб самолётларни суратга тушираётган вақтда ИИО ходимлари томонидан маҳалла қўмитаси биносига олиб кетилган. Шунингдек, уларнинг тасвирга олиш воситалари ҳам тортиб олинган. Қўлга олинган болалар ички ишлар ходимлари уларга нисбатан ўз мансаб ваколатидан чиққан ҳолда муомалада бўлгани, бақириб сўккани ва таҳдид қилганини айтган. Кейинроқ эса улар шахсий машиналарда номаълум томонга олиб кетилган.

Ваҳоланки, Вазирлар Маҳкамасининг қарорига асосан, 2022 йилнинг 1 майидан бошлаб Ўзбекистондаги халқари аэропортларда авиаспоттингга рухсат берилган.

Uzbekistan Airports эса Ўзбекистонда споттинг ҳаракатини қўллаб-қувватлаши, ёшларнинг мазкур ҳобби билан шуғулланишига тўсқинлик қилмаслигини маълум қилди. Унга кўра, 2023 йилнинг бошидан буён Тошкент аэропорти ҳудудида 30 га яқин режали ва режадан ташқари споттинг-турлар ташкил этилгани, 14 октябр куни бўлиб ўтган споттингда ҳам 6 ёшдан 15 ёшгача бўлган 12 нафар бола қатнашгани таъкидланган.