Тошкентдаги Hyatt Regency Tashkent меҳмонхонасида Марказий Осиё учун Экологик реабилитация ҳисоби Ассамблеясининг йиғилиши бўлиб ўтди. Унда собиқ уран конларини рекултивация қилиш (қайта тиклаш) масалалари муҳокама қилинди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар берди.

Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимовнинг маълум қилишича, лойиҳа Ўзбекистонда экологик жиҳатдан хавф юқори бўлган ҳудудларни тартибга солишга қаратилган ва мазкур ҳудудлардаги эски уран шахталарини бартараф этиб, инфроструктурасини яхшилаш режалаштирилган. Тадбирда бир нечта халқаро ташкилотлар иштирок этган бўлиб, улар кимёвий қолдиқларни йўқ қилиш ва бошқа йўналишларга қаратилган лойиҳаларни амалга ошириш бўйича келишиб олишган.

Шунингдек, Экология вазирлиги ва Европа тикланиш ва тараққиёт банки ўртасида «Янгиобод ва Чоркесар-2 уран мероси объектларини рекултивация қилиш» грант битими имзоланган. Объектларни рекултивация қилиш ишларини эса 2025 йилга қадар якунлаш режалаштирилган.

Бундан ташқари, 8-9 сентябр кунлари Европа Иттифоқи давлатлари вакиллари ва бир нечта дипломатик ваколатхоналар раҳбарлари собиқ уран конларини рекултивация қилиш ишлари билан танишиш мақсадида Янгиобод шаҳрига ташриф буюришади.

Таъкидланишича, Ўзбекистон Экологик реабилитация ҳисобининг бенефициари бўлиб, стратегик бош режада устувор объектлар сифатида белгиланган Тошкент ва Наманган вилоятларидаги собиқ уран конлари объектларини рекултивация қилиш режалаштирилган.