Тошкент шаҳрида 18 февраль куни кучли қор ёғиши ва у 12 соат давом этиши кутилмоқда.

Пойтахт ҳокимлиги ахборот хизматига кўра, ёғингарчилик ҳажми икки ойлик меъёрдан ошади.

Шу муносабат билан аҳолидан қуйидагилар сўралмоқда:

• заруратсиз уйдан чиқмаслик, шахсий транспорт воситаларидан фойдаланишни минималлаштиришга ҳаракат қилиш ва ҳаракатланиш учун жамоат транспортидан фойдаланиш;
• қор ва муз массалари тушиши мумкин бўлган кўп қаватли бинолар яқинида юришдан сақланиш;
• Қулоқчин таққан ҳолда ташқарига чиқмаслик — бу яқинлашиб келаётган машина ёки қор тушишини эшитмай қолишга олиб келиши мумкин;
• автомобилларни кўп қаватли бино ва иншоотлар, шунингдек, дарахтлар тагида қолдирмаслик;
• Электр ёки газ таъминотида узилишлар юзага келган тақдирда Марказий диспетчерлик хизматининг 1055 рақамига ёки Телеграм орқали мурожаат қилиш.

Қор ёғиши оқибатларини тезкорлик билан бартараф этиш учун ҳокимлик хизматлари, Йўл ҳаракати хавфсизлиги бош бошқармаси, Тошкент шаҳар ободонлаштириш бош бошқармаси ва бошқа тегишли ташкилотлар шай ҳолатда экани маълум қилинган.