Тошкентда МЧЖга тегишли бўлган шохобчада темир йўл қурилмаси ишлаш технологиясига риоя қилинмагани сабабли 7 та юк вагони рельсдан чиқиб кетган. Бу ҳақда «Ўзбекистон темир йўллари» АЖ матбуот хизмати хабар берди.

Қайд қилинишича, ижтимоий тармоқларда 7 та юк вагонининг рельсдан чиқиб кетиши ҳақидаги видео тарқалган. Ушбу ҳодиса 2024 – йил 18 май куни «Чирчиқ савдо барака» МЧЖга тегишли бўлган шохобча темир йўлида содир бўлгани маълум қилинди. BN Grain and oil group МЧЖ ходимлари вагонлардан юк тушуриш вақтида, темир йўл қурилмаси «лебёдка» ишлаш технологиясига риоя қилмаган.

Юк вагонларини тушириш вақтида юқоридаги ташкилот ходимлари лебёдка ёрдамида (керакли техникага риоя қилмасдан) вагонларни тортиб олишга уринган, қурилмадан трос узилиб, вагонлар ҳаракатлана бошлаган. Вазият давомида BN Grain and oil group МЧЖ ходимлари вагонлар ҳаракатини тўхтатишга уриниб кўришган ва натижада иккита вагон (№95547865 ва 95045464) ғилдиракларидан бутунлай чиқиб кетган, яна бешта (№95407581, 95715165, 95404547, 95046207 ва 95077327) ён томонга ағдарилиб кетган.

Ҳодисанинг сабаби қўшимча қурилма – «лебёдка» ёрдамида ишлаш технологиясининг бузилиши сифатида аниқланди. Маълумот учун, «Лебёдка» – темир йўл вагонларининг омборлар ва бинолар яқинидаги юклаш ва тушириш жойларида ҳаракатланиши учун мўлжалланган.