Тошкент шаҳри Чилонзор туманидаги «Кўзи ожизлар» жомеъ масжидида 50 ёшлар атрофидаги эркак жума намози вақтида юраги тўхтаб қолиши оқибатида вафот этди. Gazeta.uz’нинг хабар беришича, эркак намоз ўқиётган вақтида йиқилиб тушган ва худди хуррак отаётган каби қийналиб нафас ола бошлаган. Атрофдагилар унга биринчи ёрдам кўрсатишга уринган. Одамлар масжид яқинидаги дўкондан қошиқ олиб келиб, унинг ортга кетиб қолган тилини қайтарган, ёнбош ётқизиб, юрагини уқалаган.

Шунингдек, шифохонага қўнғироқ қилиниб, манзил ва бошқа керакли маълумотлар айтилган. Аммо кўрилган чораларга қарамай, шифокорлар етиб келгунга қадар унинг юраги тўхтаб қолган.

«Тез тиббий ёрдамга қўнғироқ қилинганидан 20 дақиқалардан ошиқроқ вақт ўтиб, шифокорлар бригадаси етиб келди. Бироқ тез ёрдам машинаси автомобиллар йўлни тўсиб қўйгани сабабли мурда ётган жойгача етиб келолмади. Ички ишлар органлари ходимлари ‘204 Spark машинаси кимники, машинангизни олинг, йўлни тўсиб қўйибсиз’, деб бақиришиб юрганди», – дея ҳикоя қилади Gazeta.uz мухбири.

Бундан ташқари, таъкидланишича, бундай ҳолатлар бошқа масжидларда ҳам тез-тез такрорланиб туради. Маърузаларда қайта-қайта уқтирилганига қарамай, масжидларга шахсий машиналарда бориш ва йўлларни тўсиб қўйиш ҳолатлари учраётгани айтилмоқда.