Тошкент шаҳри Сергели туманидаги омборхонада содир бўлган ёнғин қарийб саккиз соатда ўчирилди. Бу ҳақда Фавқулодда вазиятлар вазирлиги матбуот хизмати хабар берди.

Маълум қилинишича, 02:48 да чиққан ёнғин 05:02 да қуршаб олинган ва 10:47 да ўчирилган. Президент Шавкат Мирзиёевнинг топшириғи билан бош вазир ўринбосари Очилбой Раматов бошчилигида содир бўлган фавқулодда вазиятни ўрганиш, кўрилган талафотларни бартараф этиш ва жабрланганларга ёрдам кўрсатиш бўйича ҳукумат комиссияси тузилган.

Ёнғин жойига бош вазир Абдулла Арипов, Фавқулодда вазиятлар вазирлиги, Тошкент шаҳар ҳокимлиги, Прокуратура, Ички ишлар вазирлиги, Божхона бошқармаси ҳамда Фавқулодда вазиятларнинг олдини олиш ва бошқа хизматларнинг раҳбарлари етиб борган.

Воқеа жойида тегишли ташкилот ва хизматлар ҳамкорлигида тезкор штаб ташкил этилган.

Аввал хабар берилганидек, ёнғиндан жабрланганлар сони 163 нафарни ташкил этиб, уларнинг асосий қисмига аҳволи яхшилангани учун уйига жавоб берилган. Аммо, ҳодиса оқибатида 2006 йилда туғилган мактаб ўқувчиси ҳалок бўлган.

Ёнғинни бартараф этиш ишларига, ФВВ ва бошқа тегишли ташкилотлардан жами 210 та техника ва 2000 дан ортиқ шахсий таркиб жалб қилинган. Дастлабки ўрганиш ишларига кўра 15 минг квадрат/метр майдонда ёнғин ўчирилиб, 30 минг квадрат/метр майдон сақлаб қолинган.

Шунингдек, вазият тўлиқ назоратга олиниб, ҳозирда унинг оқибатларини бартараф этиш ишлари амалга оширилаётгани маълум қилинди.

«Содир бўлган ёнғин юзасидан дастлабки терговга қадар суриштирув ишлари ва моддий зарар миқдорини аниқлаш ишлари Тошкент шаҳар Прокуратураси, Ички ишлар бош бошқармаси ва Фавқулодда вазиятлар бошқармаси томонидан ҳамкорликда олиб борилмоқда», дейилади хабарда.