АҚШнинг собиқ президенти Доналд Трамп Россияни америкаликлардан супер-пупер (ғайриоддий) ракеталар лойиҳасини ўғирлаганликда айблади. Бу ҳақда у Ню-Хемпшир штатидаги ўз тарафдорлари билан бўлган митингда айтиб ўтган.

«Биласизми, Россия супер-пупер ракеталар тизимининг режасини ўғирлади. Чунки, бу ракеталар жуда тез учади. Россияликлар бу лойиҳани Барак Обама маъмурияти даврида ўғирлашган. Улар махфий режаларни ўғирлаб, уни қайта қуришди», деган Трамп.

Бироқ, Доналд Трамп қайси тизимлар ҳақида гапираётганига аниқлик киритмаган.

Маълумот учун, АҚШ гипертовушли қуролларни яратиш бўйича Россия ва Хитойдан кейинги ўринларда турибди. Россия қўшинлари гипертовушли қуролларга эга ва улар аллақачон жанговар ҳаракатларда қўлланилган.

Эслатиб ўтамиз, аввалроқ Доналд Трамп порноактрисага ноқонуний пул тўлаганликда айбланиб, Ню-Йоркдаги судда иштирок этганди ва барча айбловларни рад қилганди.