Туркиянинг Истанбул шаҳрида икки жиноий гуруҳ ўртасида содир бўлган отишмада Ўзбекистон фуқароси ҳалок бўлди. Бу ҳақда мамлакатнинг Истанбул шаҳридаги Бош консулхонаси матбуот хизмати хабар берди.

Қайд этилишича, отишма вақтида воқеа жойига яқин ерда меҳнат фаолиятини олиб бораётган 46 ёшли Ўзбекистон фуқароси, асли самарқандлик Н.З. ҳам оғир яраланган ва шифохонага олиб кетилган. Кўрсатилган тез тиббий ёрдамга қарамай у вафот этган.

Маҳаллий ҳуқуқни муҳофаза қилувчи органлар жиноят содир этган шахсларни ушлаб, уларга нисбатан тергов ҳаракатларини бошлаган.

Ўзбекистоннинг Истанбулдаги Бош консулхонаси фуқаронинг жасадини Истанбул аэропортидан Самарқанд вилоятига юбориш учун унинг яқинларига амалий ёрдам кўрсатган.

Эслатиб ўтамиз, аввалроқ Россияда бир неча йил аввал ўлдирилган ўзбекистонлик эркакнинг жасади топилган эди.