Туркиянинг Чанаккале шаҳрида фоҳишалик ишларини уюштирган ҳамда Ўзбекистондаги қизларни Туркиядаги фоҳишахоналарга етказиб бергани учун Interpol томонидан халқаро қидирувга берилган Ўзбекистон фуқароси Нилуфар Мирхонова қўлга олинди.

Туркия нашрлари томонидан «фоҳишалар маликаси», «фоҳишалар қироличаси» дея аталаётган «Мадам Клод» лақабли ушбу 40 ёшли аёл мамлакатнинг имиграцион контрабанда ва чегара масалалари бўлимининг ходимлари томонидан ушланган.

Хориж нашрларининг ёзишича, аёл фоҳишалик қилиш учун Россия, Беларусия, Қирғизистон, Туркманистон ва Ўзбекистондан кўплаб аёлларни ноқонуний йўллар билан Туркияга олиб ўтиб, воситачилар орқали фоҳишахоналарга жойлаштирган. Қўлга олинган пайтда аёл Айважик туманининг Кучукуйи қишлоғидаги уйида бўлган.

Суриштирувлар давомида Мирхонова мамлакатга ноқонуний равишда боргани ва доимий яшаш учун рухсатномаси йўқлиги аниқланган. Аёл 15 кун олдин Туркия фуқаролигини олиш учун туркиялик дўкондор M.Ш.гa турмушга чиққан.

«Биз у билан анча вақтдан бери бирга эдик, мен шокдаман. Унинг Interpol томонидан қидирувда эканлигини билмасдим, биз ёзда тўй қилмоқчи бўлиб тургандик», — деган «Мадам Клод»нинг туркиялик эри.

Маълум қилинишича, Нилуфар Мирхонова Ўзбекистонга қайтариб юборилиши учун репатриация марказига топширилган.