Украинанинг «Юрия-Фарм» фармацевтика компанияси ЕТТБнинг 10 миллион евро миқдоридаги молиявий кўмаги асосида Ўзбекистоннинг «Река-Мед» компаниясини сотиб олди. Бу ҳақда Forbes Ukraine хабар берди.

Маъдум қилинишича, ушбу битим Ўзбекистонда юқори талабли фармацевтика маҳсулотларини ишлаб чиқаришни йўлга қўйиш ва «Юрия-Фарм»нинг Украина ички бозорида маҳсулот ишлаб чиқариш қувватларининг қарийб 10 фоизини бўшатиш имконини беради.

«Юрия-Фарм» Украинадаги энг йирик бешта фармацевтика ишлаб чиқарувчилардан бири бўлиб, ўз маҳсулотларини дунёнинг 40 дан ортиқ мамлакатларига экспорт қилади. Компания ЕТТБ билан 2019 йилнинг май ойида 25 миллион евро миқдоридаги дастлабки кредит шартномасини имзолаган бўлиб, унинг икки транши қадоқлаш линияларини модернизация қилиш, арзон индивидуал дозаларда саратонга қарши дори-дармонларни ишлаб чиқаришни йўлга қўйиш ва энергия самарадорлигини ошириш чора-тадбирларини амалга оширишга мўлжалланган эди.

10 миллион евролик траншга Ўзбекистоннинг «Река-Мед» компаниясини сотиб олиниши «Юрий-Фарм»га рентабелликни ошириш ва ишлаб чиқаришни Украинадан ташқарида жойлаштириш орқали ишлаб чиқариш хатарларини диверсификация қилиш имкониятини яратиш билан бирга, Украина ва Ўзбекистон бозорларини арзон нархдаги дори воситалари билан таъминлаш имкониятини беради.

ЕТТБнинг Шарқий Европа ва Кавказ бўйича бошқарувчи директори Маттео Патроненинг сўзларига кўра, келишув «Юрия-Фарм»га ўз маҳсулотининг 30 фоизини экспорт қилиш имконини беради, шундан 15 фоизи Ўзбекистонга тўғри келади. Шунингдек, у ушбу келишув Ўзбекистонда ҳам, Украинада ҳам дори воситаларининг мавжудлиги ва фойдаланиш имкониятини яхшилашини таъкидлади.

Айтиб ўтиш керакки, Украина фармацевтика ишлаб чиқарувчиси нафақат Ўзбекистон, балки бутун Марказий Осиё бозорига кириши орқали ўз бизнесини кенгайтиради. Ўз навбатида бу келишув Ўзбекистон бозорига янги фармацевтика маҳсулотлари кириб келиши ва фармацевтика саноатини янада ривожлантириш учун имконият  яратади.