Тошкент шаҳридаги «Ҳумо арена» муз саройида қозоғистонлик репер Jah Khalib концерт дастури олдидан тартибсизликлар юзага келиб, ижтимоий тармоқларда шов-шувларга сабаб бўлган эди.

Миллий гвардиянинг Тошкент шаҳри бўйича бошқармаси хабар беришича, ходимлар томонидан жамоат тартибини бузганликда гумонланган фуқаролар воқеа жойидан хавфсиз ҳудудга олиб чиқилиб, юз бериши мумкин бўлган салбий ҳолатларнинг олди олинган. Тан жароҳати олганлар йўқ. Тартиббузарликка доир ҳолат юзасидан суриштирув ва ўрганиш ишлари олиб борилмоқда.

Эслатиб ўтамиз, аввалроқ «Ҳумо арена»даги тартиббузарликлар Jah Khalib концертига сохта чипталар сотилгани оқибатида келиб чиққан бўлиши мумкинлиги айтилганди.