Аввалроқ, Вазирлар Маҳкамасининг 2023 йил 8 августдаги 345-сонли «Умра тадбирларини ташкил этиш ва ўтказишда зиёратчиларнинг манфаатларини самарали ҳимоя қилиш бўйича қўшимча чора-тадбирлар тўғрисида»ги қарори қабул қилинганди.

Ушбу қарор асосида эндиликда Ўзбекистонда хусусий сектор томонидан Умра тадбирларини ташкил этиш ва амалга ошириш имконияти яратилади. Бу ҳақда Дин ишлари бўйича қўмита матбуот хизмати хабар берди.

Унга кўра, туристик фаолиятни амалга ошириш лицензияси чиқиш туризми кичик турининг Умра хизматларини кўрсатиш фаолияти бўйича қуйидаги қўшимча лицензия талаблари ва шартлари жорий этилиши белгиланган. Жумладан:

— 100 минг АҚШ долларидан кам бўлмаган маблағларни Туризм қўмитасининг Хавфсиз туризм жамғармасига захира қилиб қўяди;

— Умра хизматлари давомида зиёратчиларнинг гуруҳ раҳбари этиб Ўзбекистон мусулмонлари идораси билан тузиладиган шартнома асосида унинг диний билим ва кўникмаларга эга бўлган мутахассисларини тайинлайди;

— Умра хизматларини кўрсатувчи туроператор штатида исломий таълим йўналишлари бўйича республика таълим муассасаси ёки Ўзбекистон халқаро ислом академиясининг тегишли бакалавриат таълим йўналиши, ёхуд магистратура мутахассислиги битирувчиси бўлган камида бир нафар мутахассиснинг бўлишини таъминлайди.

Маълумот учун, Умра хизматларини вояга етмаган фуқароларга кўрсатиш тақиқланади. Хизматлар Саудия Арабистонидаги ҳамкор ташкилот ўртасида имзоланадиган шартномага мувофиқ амалга оширилади. Қарорда белгиланган қўшимча лицензия талаб ва шартлари 2023 йил 1 ноябрдан қўлланила бошлайди.