UzAutoMotors 8 май куни соат 10:00 да 4 500 дона Lacetti автомобилига шартнома очилиши ҳақида хабар берилган эди. Маълум қилинишича, 15 дақиқа ичида 4,4 мингта машинага шартнома тузилган.

UzAutoMotors сотувга чиқадиган барча автомобилларни шу заҳоти олиб кетиш имконияти билан шартнома тузиш мумкинлигини, шунингдек, Damas ва Labo автомобиллари учун ҳам шартнома тузилишини маълум қилган эди.

«Chevrolet Lacetti, Damas ва Labo учун шартнома тузиш фақат сайт орқали амалга оширилиши мумкин», дейилган эди хабарда.

8 май 10:15 ҳолатига кўра, 4 400 дона Chevrolet Lacetti автомобили учун шартнома тузилгани маълум бўлди. Орадан яна бир неча дақиқа ўтиб, Chevrolet Lacetti автомобиллари учун тузилган шартномалар сони 4 500 тага етди.

«Тузилган шартномаларнинг 99,9 фоизи Оnе ID тизимида рўйхатдан ўтган ва 1 та дан кўп бўлмаган автомобиль учун шартнома тузган жисмоний шахсларга тўғри келади», — дейилади хабарда.