Самарқанд вилояти Қўшработ тумани ҳудудида жойлашган Зармитан кони шахтаси юклаш пунктига бориш йўлида икки нафар шахснинг оғир тан жароҳати олган ҳолатдаги мурдаси топилган. Шунингдек, уларнинг ёнида 2 қопда жами 94 кг оғирликдаги маъдан тошлар аниқланган.

Дастлабки маълумотларга кўра, улар конга таркибида олтин бўлган маъданли тошларни талон-торож қилиш учун ноқонуний равишда кирган. Бош прокуратура Bugun.uz’га маълум қилишича уларни юклаш пунктига бориб қайтаётган ер ости ўзиюрар машина оператори аниқлаган. Бирламчи маълумотларга кўра, конга ноқонуний кирган шахсларни ўзиюрар машина оператори босиб ўтган бўлиши ҳам мумкин. Бунга сабаб эса ўзиюрар машинанинг кабинаси машинанинг ён томонида жойлашганлиги, ҳаракат йўналишининг қарама-қарши ён томони оператор кўриш радиусидан ташқарида бўлгани бўлиши мумкин.

Ҳолат 28 июнда содир бўлган. Ҳодиса жойига тезкор-тергов гуруҳи аъзоларини ҳамда Қизилқум кон техника инспекцияси мутахассисларининг чиқиши таъминланган. Ҳозирда терговга қадар текширув ҳаракатлари олиб борилмоқда.

Бош прокуратура қайд қилишича, конга ноқонуний кириб, ҳалок бўлганлар 1999 ва 2003 йилда туғилганлиги, Қўшработ туманидаги Майинтепа қишлоғида яшаганлиги аниқланган.