Индонезияда бўлиб ўтаётган ўсмирлар ўртасидаги жаҳон чемпионатининг нимчоракфиналида Ўзбекистон U-17 жамоаси Англия устидан ишончли ғалабага эришиб, чорак финал йўлланмасини қўлга киритди. Бу билан Ўзбекистон ўз тарихида иккинчи бор турнирнинг чоракфиналига йўлланма олди.

Учрашувнинг тўртинчи дақиқасида Амирбек Саидов томонидан киритилган гол ҳисобига ўйинда ҳисоб очилди. Саидовнинг голидан сўнг, англияликлар жамоаси шиддатни ошириб, ўйиннинг 36-дақиқасида жамоа аъзоси Ндала яккама-якка вазиятда Англиянинг учрашувдаги ягона голига муаллифлик қилди. Шундан сўнг, ҳисоб 1:1 кўринишига келиб, жамоалар биринчи бўлимни якунлашди.

Иккинчи бўлим бошлангач, 67-дақиқада Лазизбек Мирзаев терма жамоани олдинга олиб чиқди ва чоракфинал йўлланмасига улкан ҳисса қўшди. Ўйин 2:1 ҳисобида Англия мағлубияти билан якунланди.

Бу орқали терма жамоа орадан 12 йил ўтиб иккинчи бор чоракфиналга йўл олди.  Маълумот учун, 2011 йилда Мексикада ўтказилган жаҳон чемпионатида Ўзбекистон чоракфиналгача етиб борганди.

Эслатиб ўтамиз,Футбол бўйича ЖЧ—2026 саралаш доирасида «Бунёдкор» стадионида бўлиб ўтган ўйинда Ўзбекистон терма жамоаси Эронга қарши дуранг натижа қайд этганди.