Индонезияда бўлиб ўтаётган ўсмирлар ўртасидаги жаҳон чемпионатининг чорак финалида Ўзбекистон U-17 га рақиб бўлган Франция терма жамоаси турнирдан дисквалификация қилиниши мумкин, деб хабар бермоқда Sport News Africa.

«Монпелйе» ҳужумчиси Янис Иссуфу туфайли ушбу дисквалификация содир бўлиши мумкин. Франция терма жамоасида тўп сураётган 17 ёшли ҳужумчи Нигер терма жамоаси учун ҳам саралаш босқичида иштирок этган ва у ҳам турнирнинг гуруҳ босқичига йўлланмани қўлга киритган. ФИФА қоидаларига кўра, битта ўйинчига бир мусобақада бир нечта жамоада ўйнаш тақиқланади.

Манбага кўра, Франция терма жамоаси Иссуфунинг бошқа терма жамоада ўйнаётганини билмаган.

Франция U-17 жаҳон чемпионатининг 1/8 финалида Сенегалга қарши баҳс олиб бориб, ўйин давомида дурранг қайд этган (0:0), пеналтилар сериясида эса 5:3 ҳисобида ғалаба қозонган эди. Франциянинг чорак финалдаги рақиби ўзбекистонлик ёшлар ҳисобланади.