Ўзбекистонда тадбиркорликнинг ҳуқуқ ва манфаатларини қўпол равишда бузиш  билан  боғлиқ  181 та  жиноятга  чек  қўйилди. Бу ҳақда АОКА хабар берди.

Маълум бўлишича, 161 та солиқларни тўламаган субъектга жиноят иши қўзғатмасдан ихтиёрий тўлаш бўйича хабарномалар берилди. Қонунчиликда тақиқланмаган фаолият билан яширинча шуғулланган 103 нафар шахсга эса сўнгги йиллардаги тадбиркорларга яратилган янги имкониятлар ва имтиёзлар тушинтирилган. Шундан жами 1 515 та тадбиркорлик субъектига ҳуқуқий ва амалий ёрдам кўрсатилган ва натижада 3 157 та  янги  иш  ўринлари  яратилди.

Инсон соғлиғига хавф солувчи контрафакт ва сифатсиз маҳсулотларни ишлаб чиқариш ҳамда ўтказиш билан боғлиқ 434 та ҳуқуқбузарлик аниқланган бўлиб, шундан 23,4 млрд сўмдан зиёд яроқсиз маҳсулот муомаладан олиб қўйилди.

Бундан ташқари, кучли таъсир қилувчи наркотик ҳамда психотроп моддаларни сақлаш ва ўтказиш билан боғлиқ ҳуқуқбузарликларга қарши курашиш тадбирлари кучайтирилиб, фош этилган 90 та жиноят ишлари доирасида 423 млн сўмлик бундай турдаги дорилар ноқонуний муомаладан олиб қўйилди.

Ўз хатосини бартараф этмаган, солиқ солинадиган базани яшириш, камайтириб кўрсатиш ва солиқларни тўлашда қасддан бўйин товлаш орқали рақобатни давом эттирган субъектларга 3,3 трлн сўм солиқлар қўшимча ҳисобланган. Уларнинг 521,5 млрд сўми бюджетга ундирилиши таъминланди.

Бундан ташқари, нархларнинг барқарорлигини таъминлаш мақсадида эса 263 минг тоннадан ортиқ маҳсулот ҳудудлараро интервенция қилиниши  таъминланди.