Йўл ҳаракати қоидаларига ўзгартириш ва қўшимчалар киритиш тўғрисидаги Вазирлар Маҳкамаси қарори қабул қилинди. Бу хақда Норматив-ҳуқуқий ҳужжатлар лойиҳалари муҳокамаси порталида маълум қилинди.

Унга кўра, йўлларда ҳаракат иштирокчилари хавфсизлигини таъминлаш ҳамда белгиланган ишларнинг сифатини янада ошириш мақсадида ушбу қарор қабул қилинган.

Қарорда Вазирлар Маҳкамасининг 2022 йил 12 апрелдаги 172-сон қарори билан тасдиқланган Йўл ҳаракати қоидаларининг иловасига мувофиқ бир қанча ўзгартириш ва қўшимчалар киритилган.

Ушбу қарорда индивидуал ҳаракатланиш воситалари – скутерлар тушунчасига таъриф бериш, улар билан боғлиқ қўшимчаларни йўл ҳаракати қоидаларида акс эттириш ҳамда йўл белгиларини тегишли белгилар билан тўлдириш кераклиги айтилган.

Маълумот учун, қарорда 2024 йил 1 январдан бошлаб ДЙҲХХ органларида двигатели 25 ва ундан ортиқ куб/сантиметр иш ҳажмига эга бўлган ёки конструкциявий тезлиги соатига 25 ва ундан ортиқ километр бўлган автомототранспорт воситалари, электродвигателининг қуввати 0,25 киловатт ва ундан ортиқ ёки соатига 25 километр ва ундан юқори тезликка эга бўлган электромобиллар (электромотоцикллар, электроскутерлар ва бошқалар), шунингдек, тиркама ва ярим тиркамалар давлат рўйхатидан ўтказилиши белгилаб қўйилган.

Шунингдек, ушбу давлат рўйхатидан ўтказиладиган транспорт воситаларини бошқариш фақат тегишли тоифадаги ҳайдовчилик гувоҳномасига эга бўлган шахсларга рухсат бериладиган бўлди.

Эслатиб ўтамиз, аввалроқ Парижда электроскутерлардан фойдаланиш бутунлай тақиқланганди. Шунингдек, Bugun.uz мазкур транспорт воситаларининг пиёдалар учун туғдирадиган ноқулайликлари ва хавфлари ҳақида маълумот берганди.