Статистика агентлиги берган маълумотларга кўра, шу йилнинг январ–cентябр ойларида никоҳдан ажралишлар сони республика ҳудудида 37,7 мингтани ташкил этган. Бу эса 2020 йилнинг мос даврига нисбатан 17,7 мингтага кўпайганини кўрсатган. Ажралишларнинг 60,3 фоизи шаҳар жойларида, 39,7 фоизи қишлоқ жойларида кузатилган.

Шунингдек, оилада бир нафар фарзанд билан никоҳдан ажралишлар сони 10 минг 229 тани, икки ва ундан ортиқ фарзанд билан никоҳдан ажралишлар 8 минг 331 тани ташкил этган. Фарзандсиз никоҳдан ажралишлар сони анча кўп бўлиб,19 минг 94 та бундай ҳолат қайд этилган.

Никоҳдан ажралишларнинг энг юқори ўсиш суръати Хоразм, Андижон, Фарғона, Жиззах ва Наманган вилоятларида, ўсишнинг паст даражаси эса Самарқанд, Сирдарё, Бухоро, Қашқадарё вилоятлари ва Қорақалпоғистон Республикасида қайд этилган. Ажрашганларнинг ўртача ёши эркаклар учун 37 ёшга, аёллар учун 32,9 ёшга тенг бўлган. Бунда энг катта кўрсаткич 62,3 фоиз билан 35 ёшгача бўлган ажралаётган аёллар улушига тўғри келган.

Маълумот учун, тўққиз ой давомида никоҳдан ажралишлар сони энг кўп ҳудуд Тошкент шаҳрида қайд этилган бўлиб, пойтахт шаҳарда 4 минг 626 та ҳолат кузатилган. Шу билан бирга, Фарғона ва Андижон вилоятлари ҳам бошқа ҳудудларга нисбатан юқори даражани эгаллаган. Энг кам ажралишлар эса Навоий вилоятида бўлиб, 1 минг 109 тани ташкил қилган.

Эслатиб ўтамиз, аввалроқ 2022 йилнинг 9 ойи ичида қанча киши никоҳдан ажрашгани ҳақида хабар берилганди.