Ўзбекистонда бола туғилганда бериладиган бир марталик нафақа суммаси меҳнатга ҳақ тўлашнинг энг кам миқдорининг 70,3 фоизи деб белгиланган. 2023 йил 1 декабрдан бошлаб бу миқдор 738 минг 150 сўмга ўзгарди.

«Суюнчи нафақаси»ни тайинлаш бўйича хизматлар 2020 йилдан бошлаб, фуқароларнинг мурожаатисиз композит шаклда амалга оширилмоқда.

Бугунги кунда бола туғилганда болага бериладиган фамилия, исм ва ота исми, ота-она ва уларнинг никоҳи, бола рўйхатга қўйиладиган поликлиника ва ички ишлар бўлими, навбатга қўйиладиган давлат мактабгача таълим ташкилоти ҳақидаги барча маълумотлар тиббиёт муассасаси (туғруқхона, шифохона туғруқ бўлими, оилавий поликлиника) томонидан «Туғилиш ва ўлимни, шу жумладан перинатал ўлимни электрон рўйхатга олиш» автоматлаштирилган ахборот тизимига киритилади.

Пенсия жамғармасига кўра, барча зарурий маълумотлар тиббиёт муассасаси ва ФҲДЁ ахборот тизимларидан электрон шаклда олинган ҳолда «Суюнчи» нафақаси жамғарма томонидан автоматик равишда тайинланади.

Шунингдек, фуқаролар янги туғилган фарзандлари учун ушбу пулларни Хаzna иловаси орқали осонгина олишлари мумкин.