Ўзбекистондан Россиянинг Оренбург шаҳрига олиб борилган помидор ва узум партиялари таркибидан зарарли моддалар аниқлангани сабабли тўхтатиб қолинди. Бу ҳақда Prooren.ru хабар берди.

Қайд этилишича, 2023 йилнинг 28 сентябр куни «Уралкомплект» вақтинчалик сақлаш омборхонасида сақланган 15,88 тонна узум текширувдан ўтказилганида унинг таркибидан Евроосиё Иқтисодий Иттифоқи ҳудудида тақиқланган зараркунанда организм аниқланган.

Шунингдек, 16, 4 тонна помидор текширилганда эса унинг таркибидан Жанубий Америка помидор куяси (Tuta absoluta (Meyrick)) аниқланган.

Маҳсулотлар таркибида зарарли моддалар борлиги «Дон сифатини баҳолаш маркази» Федерал давлат бюджет муассасасининг Оренбург филиали мутахассислари томонидан ўтказилган лаборатория текшируви давомида аниқланган.

Шундан сўнг помидор ва узум партияларини Оренбургга олиб кириш тақиқланган. Айбдорлар эса маъмурий жавобгарликка тортилган.

Эслатиб ўтамиз, аввалроқ Қозоғистонга экспорт қилинган помидорларда хавфли вирус аниқлангани рад этилган эди.