Dunyo ахборот агентлиги хабар беришича, 9 ноябр куни Ўзбекистоннинг АҚШдаги элчиси Фурқат Сидиқов ўриндошлик асосида мамлакатнинг Канада ва Бразилиядаги (қароргоҳи Вашингтонда) элчиси этиб тайинланган.

52 ёшли Фурқат Сидиқов аввал Ўзбекистон ташқи ишлар вазирининг биринчи ўринбосари лавозимида ишлаган. У 1993 йилда Тошкент давлат техника университетини тамомлаган. Меҳнат фаолияти давомида O’zDeuElektroniks ҚК, Ўзбекистон Президенти ҳузуридаги Стратегик ва минтақалараро тадқиқотлар институти ишлаган.

2002 йилдан бери ТИВ тизимида турли лавозимларда фаолият кўрсатиб келмоқда. Хусусан, Ўзбекистоннинг АҚШдаги элчихонасида, Покистондаги элчи, вазирнинг ўринбосари ва биринчи ўринбосари лавозимларида ишлаган.

Фурқат Сидиқов 2017-2023 йилларда Ўзбекистоннинг АҚШ, шунингдек, ўриндошлик асосида Канада ва Бразилиядаги элчиси бўлиб ишлаган Жавлон Вахобов ўрнига тайинланган.

Эслатиб ўтамиз, аввалроқ, Амирсаид Аъзамхўжаев Ўзбекистоннинг Полшадаги янги элчиси этиб тайинлангани хабар қилинганди.