Шу йилнинг 8 ноябр куни Ўзбекистонда суд-ҳуқуқ ва инсон ҳуқуқлари соҳасидаги ислоҳотлар World Justice Project ташкилоти билан муҳокама қилинди. ЎзННТМА ташкилотчилигида бўлиб ўтган тадбирда WJP ижрочи директори Элизабет Андерсен онлайн тарзда иштирок этиб, нутқ сўзлаган.

Унга кўра, ҳуқуқ устуворлиги индексини ННТ вакиллари билан муҳокама қилиш имконияти яратилгани алоҳида эътироф этилган. Индексни шакллантириш тартиби, унда 142 та давлатдан 3400 га амалиётчи ҳуқуқшунос ва экспертларнинг сўровлари асос бўлиши ҳақида маълумот берилган.

Тадбирда миллий ННТ вакиллари ҳам индекс тузувчилар томонидан Ўзбекистоннинг суд-ҳуқуқ тизимида кўрсатилган камчиликлар йўналишида амалга оширилган ишлар бўйича маъруза билан иштирок этишган.

Маълумот учун, 2015–2023 йилларда жами 6 миллиардга яқин аҳоли яшайдиган қатор давлатларнинг кўрсаткичи сезиларли даражада пасайгани кузатилган бўлсада, Ўзбекистон рейтинги ушбу даврда 8,9 фоизга ўсган. 2016 йилдан буён инсон ҳуқуқлари соҳасида минтақавий рейтингда 15 та давлат ичида 8-ўринни эгаллаган. Сўнгги 7 йилда 74 фоиз иштирокчи-давлатларда ҳокимият органлари ваколатларининг чекланганлиги индекси бўйича пасайиш кузатилган бўлса, Ўзбекистонда 2020 йилга нисбатан ўсиш мавжуддир.