Жинояти учун жазосини ўтаб бўлган болалардан «судланганлик» тамғасини олиб ташлаш белгиланмоқда. Олий Мажлисда «Вояга етмаганларга нисбатан жиноий жавобгарлик янада либераллаштирилиши муносабати билан Ўзбекистон Республикаси Жиноят кодексининг 77 ва 85-моддаларига ўзгартиш ва қўшимча киритиш тўғрисида»ги қонун лойиҳаси депутатлар томонидан биринчи ўқишда кўриб чиқиляпти.

Қонун лойиҳасига кўра, шахснинг вояга етмаган давридаги жинояти учун қонун олдида ўз жазосини тўлиқ ўтаб бўлгандан сўнг, унинг оқибатлари кейинги ҳаётига таъсир қилмаслиги ва ҳаётини янгидан бошлаши учун имконият берилиши мақсадида вояга етгунига қадар қилган жинояти учун жазони ўтаб бўлган шахс судланмаган деб ҳисобланиши белгиланмоқда.

«Бугун биз, депутатлар билиб-билмай жиноятга қўл уриб қўйган болаларнинг келажагига ‘болта уриб’ келаётган ‘судланганлик’ тамғасини олиб ташлашга хизмат қиладиган қонун лойиҳасини кўриб чиқдик.

Қонун лойиҳаси билан Жиноят кодексига қуйидаги ўзгартиш ва қўшимча киритилиши таклиф этилмоқда:

• 18 ёшга тўлмаган шахслар содир этган жинояти ( ўта оғир жиноятлар бундан мустасно) учун жазони ўтаб бўлганидан кейин судланмаган деб ҳисобланади;
• Иккинчидан, вояга етмаган шахсга нисбатан тайинланадиган озодликдан маҳрум қилиш жазосининг энг кам муддати бир ойга туширилади. (Амалда ушбу муддат 6 ойни ташкил қилади)», — деб хабар беради Олий Мажлис Қонунчилик палатаси Спикери ўринбосари Одилжон Тожиев.

Мажлисда қонун лойиҳаси депутатлар томонидан қабул қилинган.