Жиззахда 19 ёшли фуқаро Ўзбекистонда таъқиқланган диний материалларни тарқатганликда айбланиб, 3 йилга озодликдан маҳрум қилиш жазосига ҳукм қилинди.

Хабарда айтилишича 19 ёшли йигит жиноят кодексининг 241-1 моддасига зид бўлган ( жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) ахборотларни Telegram тармоғидаги шахсий каналида тарқатганликда ва дўстларига  юборганликда айбланди.

Суд мажлисида сўроқ қилинганида судланувчи пушаймонлиги, бу нарсанинг (тақиқланган диний материал) мазмунига тушунмагани, билими етмаганини маълум қилди. Шунингдек, унинг оилавий шароити, муқаддам судланмагани, қолаверса, маҳалласидан кафолат хати билан мурожаат қилингани инобатга олиниб, унга озодликни чеклаш жазоси тайинланди, — дейди судя Ирода Муҳаммедова.

Судланувчи Redmi 9 телефони орқали жиноий ҳаракатларни содир этган ва март ойидан буён Telegram тармоғида ақидапарастлик ғоялари илгари сурилган материалларни кузатиб борган.

Аввалроқ Дин ишлари бўйича қўмита Ўзбекистонда тақиқланган материаллар рўйхатини эълон қилганди. Мазкур материалларни Ўзбекистонга олиб кириш, тайёрлаш, тарқатиш ва намойиш этиш беш йилдан саккиз йилгача озодликдан маҳрум қилиш билан жазоланиши мумкин.