Жиззах вилоятида ҳомиладорлик ва туғиш таътили пуллари тўлаб берилмаганлиги ҳолати аниқланди. Бу бўйича Омбудсманга мурожаат келиб тушган.

Аниқланишича, фуқаро М.Н. 2021 йилдан буён «Жиззах сув таъминоти» МЧЖ Фориш филиалининг мурожаатлар бўлими, ижро интизоми мутахассиси сифатида ишлаб келган ва 2023 йил сентябр ойида ҳомиладорлик ва туғруқ таътилига чиққан. Ушбу масалада икки ойдан бери бир неча бор жамиятнинг Фориш филиали бош ҳисобчисига мурожаат қилганда, унга тушум режаси бажарилмагани учун кечикаётгани айтилган.

Ҳолат Олий Мажлиснинг Инсон ҳуқуқлари бўйича вакили томонидан назоратга олинган. Аёлнинг ҳуқуқларини тиклаш бўйича Камбағалликни қисқартириш ва бандлик вазирлигига мурожаат қилинганидан сўнг, МЧЖ томонидан фуқаро М.Н.нинг пластик картасига ҳомиладорлик ва туғиш таътили нафақаси тўлиқ ўтказиб берилган.

Маълумот учун, Меҳнат кодексининг 404-моддасига кўра, аёлга туғруққача 70 календар кун ҳамда туғруқдан кейин 56 календар кун (туғиш қийин кечган ёхуд икки ёки ундан ортиқ бола туғилган тақдирда етмиш календар кун) ҳомиладорлик ва туғиш таътили берилиб, қонунчиликда белгиланган, лекин ўртача ойлик иш ҳақининг етмиш беш фоизидан кам бўлмаган миқдорда нафақа тўланади. Ҳомиладорлик ва туғиш таътили аёлга жамланган ҳолда ҳисоблаб чиқарилиб, туғруққача ҳақиқатда фойдаланилган кунлар сонидан қатъи назар, тўлиқ берилади.