Самарқанд вилояти Каттақўрғон туманида тўрт нафар шахс 25 январ куни тижорат банкларидан бирига тегишли, ичида 720 миллион сўм бўлган банкоматни ўғирлаб кетишган. Ички ишлар вазирлиги матбуот хизматининг хабар беришича, ушбу жиноятни содир этган шахсларни аниқлаш ва уларни қидириб топиш бўйича олиб борилган суриштирувларда мазкур жиноятни тўрт нафар шахс — 1995 йилда туғилган Б.А., 1998 йилда туғилган О.З., 1994 йида туғилган Б.Н. ва 1994 йилда туғилган Х.О. лар содир этгани аниқланган.

Шунингдек, суриштирув давомида Каттақўрғон туман Таварон маҳалласи ҳудудидаги ташландиқ жойдан ўғирланган банкомат бўлакларга бўлинган ҳолда топилган.

Қайд этилишича, ҳозирда жиноятчилар қўлга олиниб, уларга нисбатан қамоққа олиш тарзидаги эҳтиёт чораси қўлланган. Ҳолат юзасидан жиноят иши қўзғатилиб, тергов ҳаракатлари олиб борилмоқда.

Аввалроқ Қашқадарёда савдо растаси ва банкомат ёниб кетгани ҳамда Андижонда банкнинг собиқ ходимлари банкомат пулларини ўзлаштиргани аниқлангани ҳақида хабар берилганди.