Хориж нашрларига кўра, Ғазо секторининг бомбардимон қилиниши туфайли Яман ҳусийлари Исроилга қарши баллистик ракеталар, дронлар билан ҳужум бошлаган. Яман Қуролли кучларининг бригада генерали Яҳё ас-Сар буни расман тасдиқлаган.

«Мамлакат қуролли кучлари Исроил агрессиясини тўхтатмагунча ракета ҳужумларини давом эттиради» деган генерал ўзининг Х ижтимоий тармоғидаги саҳифасида.

Хорижий нашрларнинг ёзишича, шу йилнинг 30 октябр куни Ямандан учирилган ва Эйлат шаҳри томон йўл олган ҳусийларнинг баллистик ракетаси Исроил кучлари томонидан уриб туширилган. Оқибатда, Исроил тарихда илк бор космосдаги жангни уюштирганлиги таъкидланган.

«Исроил Ердан ташқарида баллистик ракетани уриб тушириш учун Arrow ракетага қарши мудофаа тизимидан фойдаланди ва бу коинотдаги илк жанг бўлди» дейилган хабарда.

Маълумот учун, ушбу Arrow тизими аввалроқ 2017 йилда Исроил ҳарбий самолётини ўтказиб юборган ва Исроил шаҳарчаси томон йўл олган Суриянинг S-200 ҳаво ракетасини уриб тушириш учун ишлатилган. Аммо, фақат бу галгиси ўз мақсадида ишлатилган.

Эслатиб ўтамиз, аввалроқ Исроил Эрдўғондан ҲАМАС тарафдорларини Туркияга олиб кетишни сўраганди. Шунингдек, Баҳрайн Исроил билан иқтисодий алоқаларни тўхтатганди. Бундан ташқари, Исроил-Фаластин можаросидаги томонлардан қайси бири ижтимоий тармоқларда кўпроқ қўллаб-қувватланаётгани ҳақда хабар берилганди.