Хориж манбаларининг маълум қилишича, Исроилнинг ўта ўнгчи вазирларидан бири бўлган Амичай Элияху ўзининг радиога берган интервьюсида Ғазо секторига ядровий зарба бериш «ажойиб бир имконият» эканлигини айтган. Шунингдек, у сектор аҳолисига инсонпарварлик ёрдами етказилишига қарши чиққан. Унинг сўзлари, мамлакат бош вазири Бинямин Нетаняху томонидан қаттиқ қораланган.

Вазирнинг гаплари Исроилда кенг танқидларга сабаб бўлган. Бош вазир Нетаняху Элияхунинг таклифини танқид қилиб, уни вазирлар маҳкамаси йиғилишларида қатнашишдан номаълум муддатга маҳрум қилган.

Элияхуни Исроил мухолифати етакчиси Яир Лапид ҳам танқид қилиб, вазирнинг бу гапларини «тентакона ва ақлдан озган», вазирнинг ўзини эса экстремист деб атаган.

«У асирларнинг оилаларини, бутун бир жамиятимизни ҳақорат қилди ва халқаро ишончимизга путур етказди» деган Лапид.

Танқидлардан сўнг, Элияху уни нотўғри тушунишганини таъкидлаган.

«Биз терроризмга қарши кучли ва номутаносиб жавоб беришимиз керак. Бу эса нацистлар ва уларнинг тарафдорларига терроризм фойдасиз эканлигини тушунтириб беради. Бу демократик мамлакатлар террорга қарши тура оладиган ягона формуладир» деган у ўзининг Х ижтимоий тармоғидаги саҳифасида.

Эслатиб ўтамиз, аввалроқ Исроил фазодаги ракетани уриб тушириши билан тарихда илк марта коинотдаги урушни бошлаб берганди.