Шу йилнинг cентябр ойида Ridetech International B.V. компаниясига икки ой муддатда ўз фаолиятини қонун ҳужжатлари асосида ташкил этиш учун солиқ резиденти сифатида рўйхатдан ўтиш ва белгиланган солиқларни тўлаш, ҳамда солиқ органлари ахборот тизими билан интеграциялашувни таъминлаш, мижозларга автоматик шакллантириладиган фискал чек тақдим этиш cингари талаблар қўйилганди.

2023 йилнинг 1 декабрга қадар талаблар бажарилмаган тақдирда, Солиқ қўмитаси Рақамли технологиялар вазирлигига Yandex Go компаниясининг Ўзбекистон ҳудудида агрегатор сифатида фойдаланиб келинаётган электрон Платформадан фойдаланишни блоклаш ҳақида Давлат солиқ қўмитасига расмий мурожаат қилганди.

Қўмита берган маълумотларга кўра, бугун, 1 декабр кунидан Yandex Gо хизмати солиқ резиденти сифатида барча талабларни бажариб, солиқ тўлай бошлаган. Қайд этилишича, хизматлар эндиликда «YandexGo UB» МЧЖ томонидан тақдим этилади.

«Шу кундан бошлаб Yandex Gо хизмати ўз ҳисоб-китобларини Ўзбекистон Республикаси қонунчилиги талаблари асосида юритади, бирламчи ҳужжатларни ва солиқ ҳисоботларини тақдим этади ҳамда белгиланган солиқларни тўлайди. Бу ҳақда Ridetech International B.V. Солиқ қўмитасини расмий хат орқали хабардор қилди», — дейилган қўмита хабарида.

Шу билан бирга, фискал маълумотлар оператори билан интеграциялаш бўйича ишлар ўз якунига етган. Айни вақтда ўзини ўзи банд қилган шахслар ва юридик шахслар ушбу сервис ёрдамида ташиш хизматини кўрсатганда мижозларга фискал чек бериш масаласи кўриб чиқилаётгани айтилган. Бундан ташқари, My Taxi ва Uklon хизматларининг фискал маълумотлар оператори билан интеграциялаш ишлари ҳам якунланган. Яқин кунларда улар орқали кўрсатилган ташиш хизматлари учун ҳам тўловлар фискаллаштирилиши кутилмоқда.

Солиқ қўмитасининг қўшимча қилишича, Yandex Gо ўз фаолиятини қонун ҳужжатларига мувофиқлаштириш бўйича қўмита томонидан қўйилган барча талабларни бажармоқда.

Аввалроқ, Yandex Go технологиялари ҳайдовчиларнинг ҳайдаш пайтида кескин манёврлар улушини икки баравар камайтиргани ҳақда хабар берилганди.