Америка Қўшма Штатларига Мексика чегараси орқали ноқонуний ўтган 119 нафар Ўзбекистон фуқароси депортация қилиниб, ватанга қайтарилди. Бу ҳақда Uzreport телеканалида эълон қилинган видеолавҳада маълум қилинди.

Билдирилишича, 2021 йилнинг октябридан 2023 йилнинг октябр ойига қадар 13 мингдан ортиқ Ўзбекистон фуқароси қўлга олинган. АҚШга виза олиш осон бўлмагани сабабли аксарият одамлар дўстларининг чақируви билан яхши ҳаётни орзу қилиб, ноқонуний йўлни танлаб Мексика орқали ўтишган.

Депорт қилинганлардан бирининг айтишича, у ўртоғи билан поччасининг чақируви билан Америкага кетган ва 30 кун ичида етиб боришган. Ушбу фуқаро, шунингдек, ундан 5000 доллар сўрашганини, Америкада қандай қийинчиликларга дуч келганини гапириб берган.

«3 сентябр куни кирдик қамоқхонага, 110 кун ушлаб турди. Нон беришмас экан, бизлар нонни яхши кўрамиз, овқатлари қайнатилган, қовурилган эмас. Шу қийинчиликларни кўриб келдик. Бундан ташқари, Америкада бир милиция ходимига депорт қилмаслигини сўраб, ёнимиздаги 2000 доллар пулни ҳам берганмиз», дейди у.

Яна бир фуқаро эса Америкага ошпазлик қилиш учун боргани, 18 минг долларга куйгани, «турмада» ётгани, оила аъзолари, болалари билан гаплашолмай қийналгани, ярим йил у ерда бўлгани ҳақида айтиб ўтган.

Айтилишича, Америкада асосан Марказий Осиё фуқаролари учун рейдлар бошланган. Қайтиб келган фуқаролар у ерда иш топиш қийинлиги, аёллар эса 3-4 ойлаб ишсиз қолиб кетганини билдиришган.

Эслатиб ўтамиз, аввалроқ Самарқанд вилоятида фуқароларни Green cardʼда ютиб чиққани ҳақида алдаб, пулини шилган тадбиркор 5 ярим йилга қамалгани хабар қилинганди.