Нью-Йоркдаги «Mount Sinai West» тиббиёт марказида амиотрофик латерал склероз билан касалланган беморга мия чипи имплантация қилинди. Бу ҳақда «Bloomberg» хабар берди.

Маълум қилинишича, қурилмани Synchron стартапи ишлаб чиққан. У аввалроқ Австралиядаги тўрт нафар беморга ўз қурилмаларини имплантация қилган. Улар ҳеч қандай ножўя таъсирга эга бўлмаган. Чип беморларга WhatsApp хабарларини юбориш ва онлайн харидларни амалга ошириш каби вазифаларни бажаришга ёрдам берган.

Таъкидланишича, яқинда амалга оширилган мия чипи имплантацияси Илон Маскнинг «Neuralink» компаниясини ортда қолдирган. Маскнинг компанияси анча кичикроқ ва кучлироқ имплант устида ишламоқда. Уни соддалаштирилган жарроҳлик амалиёти ёрдамида мияга жойлаштириш мумкин. Бироқ, бунинг учун беморнинг бош суягининг бир бўлаги ҳам олиб ташланиши керак бўлади ва компания ҳали одамларда синовдан ўтказиш учун рухсат олмаган.

Маълумот ўрнида, ҳаракат қилиш ва гапириш қобилиятини йўқотган одамга мия чипини ўрнатиш қуйидаги афзалликларни беради:

• Бемор интернетдан фойдаланиш кўникмаасига эга бўлади;
• У фикр кучидан фойдаланган ҳолда электрон почта ва матнли хабарлар орқали мулоқот қилади;
• Қурилма беморнинг ниятларини компютерга юбориладиган буйруқларга айлантиради.

Аввалроқ Германия ва Швейцария олимлари инсон миясига хаёлларни ўқий оладиган микрочипни ўрнатганди. Шунингдек, Илон Маск одамларга чип ўрнатишни бошлаши маълум қилинганди.