Бугун, 20 январ куни маҳалллий вақт билан соат 08:08 дан бошлаб Бухоро аэропортида ҳаво кемаларини қабул қилишга чекловлар жорий этилди.

Келтирилишича, чекловларга туман ҳамда кўриш масофасининг 100 метргача пасайиши сабаб бўлган.

Жумладан, Silk Avia авиакомпаниясининг Тошкент-Бухоро йўналиши бўйича учган US-803 рейси экипажи Самарқанддаги муқобил аэродромга йўл олишга қарор қилган. Бортида 58 йўловчи бўлган самолёт маҳаллий вақт билан соат 09:05 да Самарқандга қўнган.

Аввалроқ, Тошкент аэропортининг фаолияти қалин туман сабабли вақтинча чеклангани ҳақда хабар берилганди. Кўриш масофасининг 150 метргача пасайиши ортидан бир нечта рейслар Самарқанддаги муқобил аэродромга йўналтирилганди.