Наманган шаҳри Давлатобод тумани ҳокимнинг инновацияларни ривожлантириш масалалари бўйича ўринбосари Абдурасул Қаюмов вафот этди. Бу ҳақда туман ҳокимлиги ахборот хизмати хабар берди.

Маълум қилинишича, у нафас етишмовчилиги сабабли Республика кўп тармоқли шошилинч тиббий ёрдам маркази Наманган филиалида вафот этган.

Маълумот учун, Абдурасул Қаюмов 1995 йил Наманган шаҳрида туғилган. 2018 йил Малайзиянинг LimKokWing ижодий технология университети (кундузги) тамомлаган.

2022 йилнинг 16 августида Давлатобод туман ҳокимининг инновацияларни ривожлантириш масалалари бўйича ўринбосари лавозимига тайинланган. Бунгача ҳокимликда инвестиция ва ташқи савдо бўлими бошлиғи ўринбосари сифатида ишлаб келган.

Эслатиб ўтамиз, аввалроқ Қашқадарё вилоятининг биринчи ҳокими Темир Хидиров 77 ёшда вафот этди. Бу ҳақда вилоят ҳокимлиги матбуот котиби Bugun.uz’га хабар берганди. Шунингдек, Сирдарё вилоятининг Янгиер шаҳри ҳокими Хўжаев Илёр Ахмад ўғли бетоблик туфайли вафот этгани ҳақида хабар берилганди.