Президентимиз Шавкат Мирзиёев Иқтисодий ҳамкорлик ташкилотининг ўн олтинчи саммитида нутқ сўзламоқда. Бу ҳақда Президент матбуот котиби Шерзод Асадов хабар берди.

Давлат раҳбари саммит умумий тараққиёт йўлида кўп томонлама ҳамкорликни кенгайтиришга бўлган қатъий интилишнинг яққол далили эканини таъкидлаган.

«Бугун кўз ўнгимизда дунё сиёсий архитектураси том маънода ўзгармоқда ва глобал қайта қурилиши содир бўлмоқда», – деган Президент.

«Ҳамкорликнинг иқтисодий барқарорлик ва тараққиёт сари» шиори остида ўтаётган саммитда, Президент олий мартабали меҳмонлар билан кўп томонлама алоқаларни янги босқичга олиб чиқиш масалалари бўйича муҳокама қилишни таъкидлаган.

Шавкат Мирзиёев ташкилот аъзоларини муштарак тарих ва муқаддас ислом дини, бой маданият ва ўхшаш қадриятлар чамбарчас боғлаб туриши ҳақида гапириб, ярим миллиард аҳоли яшайдиган кенг минтақани савдо-иқтисодий, саноат, инвестиция ва инновациялар, транспорт соҳаларидаги алоқаларни ривожлантиришда катта салоҳиятга эга эканлигини қўшимча қилган.

Аввалроқ, Ўзбекистон Президенти Шавкат Мирзиёев Эрон ва Тожикистон раҳбарлари билан учрашгани ва Қозоғистон бош вазири Алихон Смаиловни қабул қилгани хабар қилинганди.