Тошкент шаҳрида «Эски ТошМИ» ҳудудидаги собиқ кадет корпусининг босмахона биносини реставрация қилиш лойиҳаси тасдиқланди. Бу ҳақда Маданий мерос агентлиги хабар берди.

Келтирилишича, 2024 йилнинг 11 январ куни агентлик ҳузуридаги илмий-эксперт кенгашининг 1-сонли йиғилиши бўлиб ўтган ва унда «Ўзшаҳарсозлик LITI» давлат муассасаси томонидан тақдим этилган «Тошкент тиббиёт академиясининг кўп тармоқли клиникасида бино ва иншоотларини қуриш, реконструкция қилиш» лойиҳаси кўриб чиқилган.

Лойиҳага кўра, ушбу бинога мос равишда 26 метр, 13 метр ва 52 метр масофалардаги «Аккредитация-симуляция» қўшимчасига иккита ётоқхона биносини қуриш, лойиҳада черков бўлган бинонинг юқори қисмини тиклаш, биноларнинг ташқи кўринишини ҳамда конструктив ҳолатини сақлаш белгиланган.

Агентлик ҳузуридаги илмий-эксперт кенгаши томонидан «Ўзшаҳарсозлик LITI» давлат муассасаси томонидан ишлаб чиқилган Тошкент тиббиёт академиясининг биноси (собиқ Кадетлар биноси) реконструкция қилиш ва иншоотларини қуриш лойиҳаси юқорида белгиланган талаблар, шунингдек, бинонинг ташқи кўринишини конструктив тарзда сақлаш шарти билан тасдиқланди. Маъқулланган кенгаш лойиҳасининг хулосаси тегишли тартибда «Ўзшаҳарсозлик LITI» давлат муассасига юборилган.

Маълумот учун, шу йилнинг январ ойи бошида ижтимоий тармоқларда пойтахтнинг Яшнобод туманида жойлашган Тошкент тиббиёт академиясининг кўп тармоқли клиникаси биноси бузилиши ҳақида хабарлар кенг муҳокамаларга сабаб бўлган эди. Ушбу ҳолатга жавобан Маданий мерос агентлиги томонидан берилган расмий баёнотда бино бузилмаслиги ҳамда объектда олиб бориладиган таъмирлаш ишлари ҳақида қўшимча ахборот берилиши маълум қилинган.