Ижтимоий тармоқларда Фарғона шаҳрининг Регистон кўчасида жойлашган турар жой биноси режага кўра 4 қават эмас, 7 қават қилиб қурилаётгани ҳақида тарқалган хабарлар юзасидан Қурилиш ва уй-жой коммунал хўжалиги вазирлиги муносабат билдирди.

Унга кўра, Регистон кўчасидаги бўш ер майдонида 4 қаватли турар жой биноси, автотураргоҳ, болалар майдончаси қуриш ҳамда туташ ҳудудни ободонлаштириш ва кўкаламзорлаштириш объекти 2018 йил 3 декабрь куни рўйхатдан ўтган ҳамда қурилиш ишлари бошланган, шунингдек, объектда инспекция томонидан доимий назорат ишлари олиб борилган.

Аниқланишича, ушбу турар жой биноси лойиҳа ҳужжатларида 4 қават қилиб қурилиши белгиланган, бироқ амалда эса 7 қават қилиб қурилган. Натижада объектнинг бешинчи, олтинчи, еттинчи қаватларини қуриш учун пастки қаватларнинг юк кўтариш қобилиятини ўрганиш бўйича МЧЖ томонидан тайёрланган техник хулосага асосан юқори қаватларни енгил қурилиш материалларидан бажаришга тавсия этилган.

Лекин буюртмачи ва пудратчи томонидан ушбу хулосага асосан лойиҳа ҳужжатлари қайта тўлиқ ишлаб чиқилмаган, белгиланган тартибда экспертизадан ўтказилмаган ҳамда инспекцияга хабарнома юбориб, рўйхатдан ўтмасдан қурилиш ишлари амалга оширилгани аниқланди.

Ушбу ҳолат юзасидан Фарғона вилоят қурилиш соҳасида ҳудудий назорат инспекцияси томонидан объект қурилишини тўхтатиш тўғрисида 2022 йил 12 декабрда ёзма кўрсатма берилган. Шунингдек, аниқланган қонун бузилиш ҳолати бўйича 2022 йил 26 декабрь куни маъмурий ҳуқуқбузарлик тўғрисида баённома расмийлаштирилиб, маъмурий судга юборилган.

Маълум қилинишича, бугунги кунда объектда қурилиш-монтаж ишлари тўхтатилган.

Аввалроқ Ўзбекистонда 2022 йилнинг 9 ойида 1,5 миллиард сўмдан ортиқ қурилиш ишлари сифатсиз бажарилгани аниқланлангани, шунингдек, Андижонда янги қурилаётган турар жой биносида бир қатор камчиликлар аниқлангани ҳақида хабар берилганди.