Фарғона вилояти Ички ишлар бошқармаси ҳодиса ўтган йилнинг 17 декабр куни содир бўлганини маълум қилди. Фуқароларнинг ИИОга шикояти асосида Фарғона шаҳар ИИО ФМБ 3-сон ИИБ профилактика инспектори капитан Т.Ҳошимов тунги соат 23:50 да шаҳардаги Машъал МФЙдаги кўп қаватли уйнинг ертўласида жойлашган Rich кўнгилочар маскани (караоке бар)га борган.

ИИБ профилактика инспектори тунги вақтда фуқароларнинг тинчини бузиб, баланд овозда қўшиқ куйлаётган ва компютер ўйнаётган мижозларни тарқатмоқчи бўлганида, ушбу маскан раҳбари 28 ёшли А.Х. ИИО ходимларининг қонуний талабларига бўйсунмай, жамиятда юриш-туриш қоидаларини қасддан менсимасдан, фаол қаршилик кўрсатган.

Мазкур ҳолат юзасидан фуқаро А.Х.га нисбатан МЖтКнинг 183-моддаси, 194-моддалари билан ҳужжатлар расмийлаштирилиб қонуний қарор қабул қилиш учун ЖИБ Фарғона шаҳар судига юборилган.

Эслатиб ўтамиз, аввалроқ Тошкент шаҳрида ИИО ходимлари 15 ёшли йигитга қўполлик қилгани акс этган видео тарқалганди. Воқеа бўйича Тошкент шаҳар ИИББ айбдор ходимларга нисбатан қатъий чора кўрилиши таъминланишини билдирганди.