Жиззах вилояти Фориш туманида кучли шамол ҳокимият биносининг томини учириб кетгани ҳақида хабарлар тарқалди. Фориш тумани ҳокимлиги ҳолатга муносабат билдирди.

Билдирилишича, Фориш туманида 10 январь куни соат 10:20 ларда шамол тезлиги 24 м/секундгача кучайиши натижасида айланма шамол юз бериб, туман ҳокимлиги биносининг катта мажлислар зали том қисмидан қисман том ёпғичларини учирган.

Оқибатда шамол учирган туника ва тахталар учиб, ҳокимият автотураргоҳида бўлган 6 та автомашина устига тушди ва қисман зарар етказган. Фуқароларга ҳеч қандай зарар етказмаган.

Табиий офат натижасида кўрилган талафотни бартараф этиш чоралари кўрилмоқда.

Эслатиб ўтамиз, аввалроқ Самарқандда корхоналардан бирининг томи ва шифти ёниб кетгани хабар қилинганди.