Шимолий Корея етакчиси Ким Чен Ин бугун, 12 сентябр куни ўзининг бронепоездида Россияга борди. Бу ҳақда «РИА Новости» хабар берди.

Қайд этилишича, Россия президенти Владимир Путин ва Шимолий Корея раҳбари Ким Чен Ин ўртасида Россиянинг Узоқ Шарқ қисмида музокаралар ўтказилади. Учрашувда минтақадаги вазият ва икки томонлама алоқалар муҳокама қилиниши кўзда тутилган. Путиннинг матбуот котиби Дмитрий Песков журналистларга берган интервьюсида учрашувнинг айнан қачон ва қайси манзилда ўтишини очиқламаган. Аммо бугун тонгда «РИА Новости» Ким Чен Иннинг зирҳли поезди Россияга келгани акс этган видеони эълон қилди.

Россия ташқи ишлар вазири ўринбосари Андрей Руденко давлат раҳбарлари ўзаро учрашувда Пхенянга гуманитар ёрдам кўрсатиш масаласини муҳокама қилиши мумкинлигини айтган.

«Барча масалалар муҳокама қилиниши мумкин. Лекин инсонпарварлик ёрдами Хавфсизлик Кенгаши резолюцияларидан чиқариб ташланган. Чекловлар бор, аммо озиқ-овқат бўйича эмас. Натижаларни башорат қилмайман, бироқ ҳукуматимизнинг кўплаб вакиллари у ерда бўлгани сабабли, масалалар бутун кенгаш бўйича муҳокама қилинади», – дейди у.

Маълумот учун, Путин ва Ким Чен Ин ўртасидаги биринчи учрашув 2019 йилнинг баҳорида Россиянинг Владивосток шаҳрида бўлиб ўтган.

Эслатиб ўтамиз, аввалроқ Шимолий Корея етакчиси Путинни тўлиқ қўллаб-қувватлашини маълум қилган эди.